Ֆուտբոլի միջազգային ֆեդերացիան Ցյուրիխում կայացած գործադիր կոմիտեի նիստում հաստատել է 2022 թվականին Քաթարում կայանալիք աշխարհի առաջնության եզրափակիչ մրցաշարի անցկացման ժամկետները: Մրցաշարը տեղի կունենա նոյեմբերի 21-ից դեկտեմբերի 18-ը: Որոշման պատճառը ամռանը Քաթարում անտանելի շոգն է: Մրցաշարը սովորական 31-32 օրվա փոխարեն կտեւի 28 օր, որպեսզի եվրոպական ազգային առաջնություններում դադարը մեծ չլինի:
